News
ኢንስቲትዩቱ ከሳይንስና ቴክኖሎጂ ሚኒስቴር እና ተጠሪ ተቋማት ጋር በመሆን የግንቦት 20 የብርዮበልዩ በዓልን አከበረ


ግንቦት 18/2008 ዓ.ም በዓሉ በጥራት መሰረተ ልማት ተቋማት ግቢ ውስጥ ሲከበር በሳይንስና ቴክኖሎጂ ሚኒስቴር ሚኒስትር ዴኤታ የሆኑት ክቡር ፕሮፌሰር ዶ/ር አፈወርቅ ካሱ እንደገለፁት የግንቦት 20 በዓልን ስኬቶች ስናስብ እኛም በመስሪያ ቤታችን በ25ዓመታት ጉዞ ውስጥ ምን አሳክተናል ምንስ ይቀረናል የሚለውን በመገምገም ሊሆን ይገባል ብለዋል፡፡ በሀገሪቱም በሁሉም ዘርፎች የተገኙትን ከፍተኛ ለውጦች ገልፀዋል፡፡
በዕለቱ በብሔራዊ የሥነ-ልክ ኢንስቲትዩት ዋና ዳይሬክተር አቶ ወንድወሰን ፍሰሀ "የማሽቆልቆል ምዕራፍ ተዘግቶ የእድገት ምዕራፍ የተከፈተበት የሩብ ምዕተ ዓመት ጉዞ" በሚል የተዘጋጀውን የመወያያ ሰነድ ለተሳታፊዎች አቅርበዋል፡፡ በሰነዱ ውስጥም ፈጣንና ህዝብ የተጠቀመበት የሃያ አምስት ዓመታት የእድገት ጉዞ፣ ማህበራዊ ልማት ተስፋፍቶ ማሽቆልቆል የተገታበት ሩብ ምዕተ ዓመት፣ የማሽቆልቆል ጉዞን የገታ የመሰረተ ልማት የተስፋፋበት ሩብ ምዕተ ዓመት፤ የማሽቆልቆል ጉዞን የገታ ዴሞክራሲ እውን የሆነባቸው ሃያ አምስት ዓመታት፣ የማሽቆልቆል ጉዞን የመግታት ከፍተኛ አስተዋፅኦ ያበረከተ መልካም አስተዳደር የታየባቸው ሃያ አምስት ዓመታት ብሔራዊ መግባባት የመፍጠር ሂደት የጎለበተባቸው ሃያ አምስት ዓመታት ከባቢያዊና ዓለም አቀፋዊ ግንኙነታችን የዳበረበት ሩብ ምዕተ ዓመት የሚሉት ይገኙበታል፡፡
በዚህ ከ800 በላይ የሴክተሩ ሰራተኞች በተገኙበት ዝግጅት የሻማ ማብራት፣ የኬክ ቆረሳ፣ ዕለቱን አስመልክቶ የቀረበ ግጥም እንዲሁም የታላቁ የህዳሴ ግድብን ለመደገፍ የተዘጋጀ ሎተሪ ክቡር ሚኒስቴር ዴኤታው፣ ዋና ዳይሬክቶችና ተሳታፊዎች የቆረጡበት ሥነ-ስርዓትም ይገኝበታል፡፡